عشنا وشفنا مسلسل صدور من دجاج( سر رشااقة سيب الاختلاط)

**بداية الاكشن**

المشهد تسان من مسلسل (عيون من زجاج<< صدور من دجاج) بكتب اللي شفته باختصار عشان اللي ما شاف الحلقة يحاول يتخيل<< وسعوا مساحة الخيال ما يصلح للي خيالهم محدود..
تسان يا ما تسان في قديم الزمان وسالف العصر والاوان حتى تسان..تسان فيه وحدة داشرة ومن حبيبها حامل..محد يدري عنها شهر كامل..يوم فطس حبيبها اشتطت اختها اللي تسنها كليوبترا .. وصار همها الوحيد انها تنزل اللي بطن اختها .. ودتها عند مشعوذن دجال .. ماتدري شكله حرمتن والا رجال.. وطلب منهم طلب ما يجي عالبال.. انه يدهن جسم الاخت عشان يطلع منه الشيطان كما هو الحال..على اساس ان فيها مس وفي طريقها للخبال..
ردت عليه الاخت اللي تسنها كليوبترا : نعم نعم انت ماتستحي على ويهك.. تبي تدهن جسم البنت انت ايش.. عيب عليك وتخزه هي واختها ويطلعون..<<الحين اختس الداشرة حامل من حبيبها..ماهنا شرهه عالدجال ياعمري صار هو اللي عيب عليه.

عاد من الطرق الرهيبة اللي تسويها كليوبترا عشان تنزل اللي ببطن اختها:
1- تربط بطن اختها الداشرة بخرقة وتشده بكل ما تملك من قوة والاخت على الارض شوي وتفطس..

2- تشربها ادوية مدري وش سالفتها عشان ينزل الجنين<< الجنين لو سمحتوا بالجيم المصرية يالله اقروها مرتن ثانية.

ومع هذا كله ماشاءالله الجنين صامد..حالفن مايطيح << استغفرالله بس
**نهاية الاكشن**

نبدا الحين نذب ونعاير في ذا المسلسلات ونخليها ما تسوى &..
المفروض في بداية المسلسل يكتبون بطولة: الجنين.. ويحطون صورته وهو في الرحم قبل كل الممثلين..<< بالله ما يصلح للجنين دور البطولة؟؟والله انه احسن منهم كلهم..

مير الله يعافيهم في المسلسلات الخليجية بين مشهد والثاني فيه دعاية .. والا تسان تجي المشاهد البريء جلطة.. من ملايين السنين في كل مسلسل خليجي يجيبون نفس الغلطة..وحدتن داشرتن تطلع مع حبيبها وترجع حاملتن بجنين وتبي سقطة ..وهذا همها في كل حلقة.. يعني باختصار الممثلة اللي بتمثل هالدور بترتاح من السيناريو لانه نفسه في كل لقطة.. << ترى ملينا..

صدز ان المسلسلات الخليجية تجيب الغلقة والكآبة وتسد النفس واللي ياكل شي وهو يطالع مسلسل خليجي بيطرش على طول..نفس الموضوع في كل مسلسل صراخ وزعاق وطق و كفوف..<< اكتشفتوا سر رشاقتي.. التطريش من المسلسلات الخليجية


***حتى المشاهير المخضرمين علقوا حول المسلسلات الخليجية :

عنما كنت في لبنان قالت لي مرة المطربة صباح تعرفونها طبعا المخضرمة المعاصرة ..تقول انها يوم كانت تبني الاهرامات مع الفراعنة.. كانت تشوف نفس المشكلة في المسلسلات الخليجية اللي كانت تنعرض ذاك الوقت يعني من سنة كح واضرط..وكانت صباح بعد كل مسلسل للزبالة توطوط<< الظاهر ان هذا سر رشاقتها ..
وقالت ان سبب طول عمرها<< ماشاء الله لا تفطس علينا ..انها سمعت نصيحة واحد من الفراعنة اللي يبنون الاهرامات قبل يموت وكانت النصيحة (ياااااااه يا صبوحة ابعدي بئة عن المسلسلات ديت.. هتتعبي والله.. ريحي دماغك بئة)
ومن بعد هذي النصيحة اتجهت صبوحة للغناء عشان تنسى اللي شافته في المسلسلات..

*** المسلسلات الخليجية في الطريق الى العالمية :


ودي اقول لاوبرا هل تريدين ان تصبحي رشيقة؟؟.. حسن(ن) اذن تعالي عندنا يومين بس.. وبفرشلتس دوشق في مقلطنا المتواضع.. وتقعدين تطالعين مسلسلاتنا وتقلبين المواجع.. وتشدين شعرتس البلاليط من اللي بتشوفينه من مقاطع..و احضري معاتس الدكتور فيل عشان اذا احتجتي لاستشارة نفسية .. تلقينه يستناتس بالغرفة الخارجية.. بكامل قواه العقلية..معه وردة وكم هدية..بيعطيهم زوجته لا رجع للولايات المتحدة الامريكية.. وانا اللي بشرط عليه شرطن ما يطالع ولا مسلسل خليجي.. اخاف عندما يرجع الى زوجته ترفع علينا قضية .. ونصير ما نعرف صينية المكرونة من الزمزمية..

لو نخلي كتاب هالمسلسلات يضربون عن الكتابة.. تسان تروح ضيقة الصدر والكآبة..بس هنا تكمن المشكلة شلون نقنعهم؟؟ << ودي اقلب جد شوي بس ماقدر

***بين الدراما الخليجية والاجنبية: مافي مقارنة طبع(ن)

الصرااحة الدراما الاجنبية توسع الصدر مرررة.. وما يحتاج من الاساس اني اقارن هذا بهذا..وقصدي بالاجنبية (الامريكية واليابانية والكورية التركية << لا عاد احلفي وش بقى) خلو المسلسلات على جنب خل نروح للممثلين الخليجين اللي مصدقين انهم يقدمون رسالة سامية للمشاهدين واهم شي انهم على بالهم يعالجون قضايا المجتمع الخليجي<< ايه هين..
يقولون اللي ما يعرف الصقر يشويه والا تقارنون مثلا :

بدرية احمد بانجلينا جولي<<اقسم بالله لو تدري انجلينا ان تفطس.

والا عيون غازي حسين بعيون جورج كلوني<< بالله مايشبه غازي حسين الخروف الخرفان.

والا يعقوب عبدالله بمهند << يلعن ضيقة الصدر اللي جتني.

والا عاد الخشة المستخشة (شيما سبت) بكاميرون دياز<< ذبة الييييمة.

محمود بو شهري بزاك ايفرون<< قمة القسوة والظلم.

واخيرا فاطمة عبدالرحيم بكاترين زيتا جونز<< خلك قوي البأس وصاحب مكانه عند القوم ولا تحاول تقارن..والله بتتعب

***خروج عن الموضوع...
على الطاري يقولون ان الممثلة كاترين زيتا جونز اسمها الاصلي صيته مساعد العنزي وهي من القصيم<< الله يا حافظ طلعت من ديرتي .. وان اخوها خلف رافعن قضية من عشر سنوات يبي يثبت انها اخته..بس الحين اثبت اختبار ال dna من عينة دم الممثلة ودم خلف انهم اخوان من نفس الام والابو..
زيتا = صيته << اللي مكتشفها ودخلها لعالم الفن غير اسمها تسذا ..
**منقول من في جريدة الوطن..**
نرجع لموضوعي..<< ياحبي للبربرة وكثر الهذرة اللي مالها داعي في الحياة اليومية..


واخرا حسين عبدالغني بديفيد بيكهام<< تسني خلطت الحابل بالنابل.
**************************************
**نصيحة :
كل فتاة وفتى يريدون التخلص من الكيلوغرامات الزائدة التي اكتسبوها من بلع الطعام الزائد عن الحاجة << تابعوا المسلسلات الخليجية .. وتحديدن الكويتية. وحطوا جنبكم زبالة للتطريش..

ممكن سؤال كالعادة<< اها بس وشولة؟؟ << عشان نطلع بفايدة من الموضوع..اجل وشولة التعب وعصر المخ؟؟
ايها المشاهد العربي الناقد <<لا تصدقون عاد ..
وشرايكم بالدراما الخليجية؟ وتتابعونها والا تحبون الدراما الاجنبية اكثر؟؟
وما تلاحظون ان في كل مسلسل نفس المشاكل والا محد لاحظ؟؟